Kung tutuusin,
wala akong matapang na dilang magsasabing mahal kita,
naisin ma’y walang mga kamay na kayang mahawakan ka,
walang mga matang masugid kang tititigan, at
walang mga paang kayang tumakbo tungo sa iyo.
Ngunit dumating ka
bitbit ang lahat ng uri ikaw
habang tumutugtog ang himig ng paborito kong kanta,
habang ang mundo’y umiikot sa kaniyang araw,
habang umuusok ang bagong gawang cappuccino sa paborito nating tambayan,
habang marahang inaakyat ng langgam ang matamis na tinapay na ating pinagsasaluhan.
ang bawat linya ng kantang ito,
ang liwanag at kapayapaang ibinabahagi mo, at
ang init ng ‘yong yakap, at tamis ng mga halik
ay unti-unti akong binabalot at marahang pinaiibig.
Wala nang ibang ibig sabihin ang dila kundi ang mahal kita,
wala nang ibang gustong madama ang palad kundi ang iyo,
mata’y nakatitig lamang sa minamahal kong ikaw,
at hindi na napapagod ang paang tumakbo tungo sa’yo.
Kaya heto ako ngayon, muling tumutula
sabay sa himig ng Waltz of Four Legged Feet na kanta
hindi na dahil hindi ko masabing ibig kita
Kundi dahil hindi ko iibigin na hindi ibigin ka F – tumatakbo si juan
