by FRANCIS MIGUELL S. STA. ROSA
sa anong punto bang
ang ina’y ‘di na ina?
‘pag supling ay tao na,
o sarili
o ina
anak pa rin ba?
saksi ako sa kaganapan
sa kanilang pagsilang
sa madaling araw ng katandaan
pasan ang daigdig,
na pinasang mayro’ng tangan
nang lumao’y nagsilang
buhat sa sinapupunan
hanggang sa nalagot
sa paglago’t pananagutan
at buhay na ang bagong magulang
hanggang sa dumating na ngang
ang makulit na magulang
ay napasa-bahay ampunan
sino’ng kukupkop?
— sino’ng kukupkupin?
sa bagay, narito naman kami
si ticia, stanley, si tandang lucing
natutunan na naming mahalin
ang magigiliw na kwento
sa taniman ng tabako
sa kolehiyo sa recto
kina rachel at roberto
ibigay man ang lahat at laan
iba pa rin ang tahanan
malamang na malamlam
ang kanilang pinagmulan
ang lumang litrato’t baro
alaala lang ng dating anyo
sa nakaarang palaisipan
kung mayro’ng pagtatapos
paminsan minsang may bisita
sa payak naming pintuan
mga nakaiwan ng bumbilya
at sulo at lampara
singtunay ng tahi’t mga bakas
katungkula’y walang wakas F
