ISANG BASO ng kwek-kwek at paborito mong isaw,
pandesal na hinahanap mo tuwing umaga,
Clover Chips kasangga ng de-plastik na Coke,
disposable na may samo-samong ulam,
kaning kasing puti ng mga krisantemong bitbit
at kasing lamig ng iyong mga daliri,
karatig ng mga kandilang tila
mga dilang humihimod sa dilim.
Kung pinagsama-sama ko ba ang lahat ng ‘to
sa harap ng parihaba mong himlayan,
sapat na ba ang isang daang piso na pulutan
para umahon ka sa lupa?
Matatawaran ko ba ang isa pang araw sa mundo
kung kinabukasan, wala pa ring bawas
ang laman ng baso mo?
Tahimik ang pagbati ng hanging
dala-dala ang samyo ng lupa.
Paubos na ang pagkit na tinutunaw
ng pulang dahong nagliliyab.
Pinagmasdan ko ang mga nitsong dinaanan
at naisip kita sa isang pares ng kutsara’t tinidor,
malinis at iniwan sa malamig na semento. F
